2024 წლის 8 ოქტომბრიდან 10 დეკემბრის ჩათვლით პერიოდში პარტნიორობამ ჯანმრთელობის კვლევისა და განვითარებისთვის (PRAH) მიმდინარე გრანტის ფარგლებში, რომელიც დაფინანსებულია აშშ ჯანმრთელობის ეროვნული ინსტიტუტის ფოგარტის საერთაშორისო ცენტრის მიერ, უკვე მესამედ ჩაატარა ახლად შემუშავებული, მოკლევადიანი კურსი - აივ/შიდსის პროგრამების იმპლემენტაციის კვლევა. 

კურსის მიზანი იყო სტუდენტებს/მსმენელებს შეესწავლათ იმპლემენტაციის მეცნიერება, კერძოდ, თუ როგორ შეიძლება შემუშავდეს და პრაქტიკაში ინტეგრირდეს საზოგადოებრივი ჯანმრთელობის მტკიცებულებაზე დაფუძნებული ინტერვენციები. კურსი მოიცავდა იმპლემენტაციის მეცნიერების ფუნდამენტურ ელემენტებს და ასწავლიდა იმ აუცილებელ უნარებს, რომლებიც საჭიროა შესაბამისი მეთოდების ეფექტურად გამოსაყენებლად, მტკიცებულებებზე დაფუძნებული ჯანდაცვისა და საზოგადოებრივი ჯანდაცვის პროგრამებისა და პოლიტიკის შემუშავების, განხორციელების და მდგრადობის უზრუნველყოფის ბარიერების გადასალახავად. სტუდენტებმა/მსმენელებმა შეისწავლეს, თუ როგორ უნდა შეიმუშაონ და შეაფასონ გადაწყვეტილებები მტკიცებულებაზე დაფუძნებული ინტერვენციების განხორციელების ბარიერების დასაძლევად. კერძოდ, სტუდენტებმა/მსმენელებმა შეისწავლეს აივ/შიდსის პროგრამების იმპლემენტაციის კვლევის მნიშვნელოვანი ასპექტები, მათ შორის: კონცეპტუალური ჩარჩოები, კვლევის დიზაინი, პროგრამის შეფასება, და სხვა. 

ყოველი სესიის ბოლოს, ინტენსიური თეორიული ტრენინგის შემდეგ იმართებოდა თემატური, რეალური შემთხვევების განხილვა და დისკუსია. კურსის ბოლოს სტუდენტებმა შეიმუშავეს და წარადგინეს პროექტები, სადაც ასახული იყო საზოგადოებრივი ჯანმრთელობის ან კლინიკური პრობლემის გადაჭრის ეფექტური პროგრამული გადაწყვეტილების იმპლემენტაციის გეგმა, ძირითადი ელემენტებით. პროექტების თემატიკა სტუდენტებმა შეარჩიეს მათი პრაქტიკის მაგალითებზე დაყრდნობით.

კურსი ჩაატარეს PRAH/თსუ ფაკულტეტის წევრებმა ამერიკელი პარტნიორების პირისპირ და ონლაინ მონაწილეობით. ამერიკელ პარტნიორებს შორის იყვნენ აშშ ნიუ-იორკის შტატის უნივერსიტეტის და ნიუ-იორკის შტატის ჯანდაცვის დეპარტამენტის შიდსის ინსტიტუტის წარმომადგენლები. კურსი ჩატარდა ჰიბრიდულ ფორმატში.  

ჰიბრიდული ფორმატის ლექცია, რომელსაც პირისპის უძღვებოდნენ პროფესორები რამეშ რაგავანი და დენიელ ომპადი, გაიმართა საქართველოს დაავადებათა კონტროლისა და საზოგადოებრივი ჯანმრთელობის ეროვნულ ცენტრში. 

საერთო ჯამში, კურსი წარმატებით გაიარა ათმა მონაწილემ: ხუთმა საქართველოდან, სამმა ყაზახეთიდან და ორმა უკრაინიდან.